6,7月係意大利結婚旺季，最近就去咗一個意佬同事嘅bachelor party. 成晚男男女女三十幾人，個個都心口掛住個男女器官食飯唱歌跳舞，係好開心噃！
問準新郎：「你哋結完婚係咪帶埋老婆仔過嚟阿根廷一齊住？」出奇地，新郎哥話未來老婆認為自己未準備好去外國生活，所以婚後佢自己一支公返嚟做嘢，半年後再返去自己國家見老婆兩星期。
我心有忐忑，鄧佢新婚高興之餘，暗暗浮現一句「祝你好運」。
我曾經同一男仔拍拖，感情非常穩定，旁人都認為我哋將會結婚的一對情侶。後來個男仔因爲轉咗公司需要喺深圳返工，由於佢國籍問題唔可以日日過關，我哋決定喺深圳租間屋。
於是乎我每逢一至五，風雨不改地朝早天未光就起身準備早餐，7點鐘已經喺深圳街口同人爭的士去關口，喺關口搭接駁巴士再轉西鐵到九龍區，氣都未透順一落車就競步15分鐘返到公司。中途冇一分鐘鬆懈過因爲如果走班車就賴硬遲到。
如是者，放工後嘅路程你應該想像到，由競步開始，西鐵......稍為唔同嘅係，我8點半到屋企附近再要狗衝去超市買餸，有時夾唔啱時間仲要面矇矇叫職員通容一下俾我入去9秒9掃貨。終於入到屋，衫都冇時間換就要洗菜煮飯同洗衫。
夜晚10點，男朋友放工返嚟可開飯了。隨後唔估都知，就係我再洗埋碗，晾衫。馬拉松式地維持咗每日朝5晚11嘅生活一年有多，根本一秒都冇得俾自己去諗辛苦與否就晚晚好似昏迷咁撻落床。
朋友甚至屋企人都不禁問「咁辛苦值得咩？」
我答「鬼叫我鍾意佢咩」
後來個男友喺深圳嘅合約完咗，要再轉去越南工作。我冇半點猶豫，提出不如跟佢一齊去越南。對方俾我嘅答案我冇忘記：「你去到越南就算揾到嘢做咪得嗰一千幾百，你邊度會慣啊？你揾唔揾嗰少少錢都係其次，最主要我怕照顧唔到你。」
順理成章 - 異地戀。
隨後嗰一年，我印象我們大概真正見過兩次面。所謂真正，意思對方講話時你會感受到佢嘅呼吸，就算唔拖手，坐喺對方身邊都會感受到佢嘅體溫。至於其餘時間都只有隔住個電腦或電話。
「香港呢幾日好凍，得8度咋」
「係啊，我呢邊日日都咁熱」
「今個星期我買咗啲新衫，有特價好抵！」
「哦，咁等我下次返嚟你著俾我睇。」
「好啊，不過我買嘅係冬天衫，你返嚟時已經係夏天......」
漸漸地，我覺得自己同個mon拍拖冇分別。起初日日通電，到每兩日一次，然後每星期一次，最後我哋選擇咗淡淡然的將對方忘記。
以上我打咗咁多粒字，其實都係想話：曾經好努力去爭取一齊相處嘅機會，就算日日齋搭車用三粒鐘都在所不計，但都係敵唔過異地戀嘅威力。當然我唔係一竹蒿打沉一船人，有人越過異地戀難關而開花結果，百分比微乎其微。愛情嘅本義，就係兩個人一起相處，異地戀即兩個人分開兩個地方，根本已遠離了愛情嘅基本步。
再者，意佬更令我體會到一個愛情觀。
到底你唔敢同對方一齊去面對未知嘅將來，擔心明明可日日食扒變兩個人食粥水？還是願意為咗同對方一起而不惜一切代價，雙方甘願放棄若干從前自己擁有的東西，而達成共識：兩個人在一起。
兩者之間選擇，全憑雙方問問自己：究竟我有幾愛對方？
前提當然唔會為愛一個人而作奸犯科，但你要是夠勇敢去愛，辦法總比困難多；講到底你不敢面對困難挫敗，你不敢愛。
愛情如人生，因為未來嘅不明確，先會蘊藏無限嘅可能性。前路茫茫，我同意佬本來南轅北轍一東一西性格倔強的一對，幾經磨練互相學習，依家走到步入教堂的階段。所有一齊面對挑戰嘅情景，歷歷在目。
我敢去愛，我敢為愛跳出自己的comfort zone。希望正徘徊喺去定留抉擇中嘅云云男女，都可問問自己：我願意為對方跳出comfort zone嗎？
#為愛情可去到幾盡
#moveoutofyourcomfortzone
Search